قووووووووم .. قووم يا عم .. انت نايم بقالك كتير أوي يخربيتك
يللا يا قلبي .. صحصح كده وفوق .. إيييييه .. انت لسه هتتاوب وتتمطع .. قوم كده خدلك دش والبس اللي ع الحبل .. واتسرح وجلجل شعرك .. وحط روج وماسكرا .. واحلق دقنك .. وعايزاك تبقى على سنجة 10 .. علشان خلاص ده جاي في الطريق .. شمة ريحة برفانه من بعيد .. يااااااه .. كنت عارفه انه ف يوم جاي ..
انت مالك بتبصلي بازبهلال كده ليه ؟؟ انت مش مصدق ؟
لأ صدق .. قوم استحمى بقى بدل ما اديك بضهر ايدي على أم وشك بقى ما تنرفزنيش .. ده انت عفنت من كتر الركنة .. قوم يللا اجهز انت لحد ما اكنس الأرضية وامسحها .. وألمعك من برا ..
علشان لما ييجي يلاقيني مجهزاله المكان ..
عارف يا واد يا قلبي .. انا فرحانه أوي .. باين عليا صح ؟ .. انا عارفه من غير ما تقول ..
أنا جيبت كمان مشاية مكتوب عليها Wellcome علشان أحطها على بابك علشان يمسح جزمته قبل ما يدخل .. مش بعد كل التنضيف ده يدخل بترابه وربنا ابهدله ولا حايهمني ..
ربنا يستر وما يبقاش زي اللي قبله بس .. اللي جيبتله قله علشان أشرّبه منها أول ما ييجي ..
حاكم انت عارف السلم وانت متشعلقلي في السابع كده وشايف نفسك ..
هما شوية شهور عدوا ومشي راح لقلب تاني .. روحت كسراها وراه وضاااعت القله .. وكنت جايباها بالغالي وحياتك .. بس يللا بقى هنعمل ايه .. بس انا اتنصحت وجيبت المرادي قصب في كيس كده وخلاص .. كفاية عليه المشاية .. احنا حاننهب ..
بس والنبي انا متفائلة خير يا قلبي المرادي .. انا هروح أجهز انا بقى .. مش معقولة تبقى انت يا قلبي متوضب ومكنوس وزي الفل وييجي يلاقيني انا بمريلة المطبخ اللي لابساها دي ..
هو الحب كده .. يدخل علينا .. يشقلبلنا حالنا .. يحمّينا وينضفنا .. ويطس على قلبنا جردل ميا معدنية يلمعه ..
ويعمل لأغنية الوحدة بتقتلني شيفت ديليت ..
ويشغل أغنية حب ويعليها ع الآخر ..
منقول
Home